الإستشارة الكبرى

أكبر إستشارة شعبية في تاريخ تونس بمشاركة أكثر من 400.000 تونسي وتونسية

Séparateur

نتائج الإستشارة

مشاغل التوانسة وانتظاراتهم

طلبنا من التوانسة باش يحدّدوا مشاكلهم وأسبابها والمسؤولين على الأزمة الحالية.

تصفية نتائج الإستشارة

Séparateur

المراحل القادمة

من الإستشارة الكبرى إلى الأنشطة الكبرى

عيش تونسي تولدت من حلم يتقاسموه ملايين التوانسة ويتمثّل في القطع النهائي مع نظام جاءر وغير عادل تسبّب في تردّي أوضاعنا وإعادة بناء تونس كيف ما نحبّوها بمستقبل مضمون. اليوم أكثر من أي وقت تعدّى لكلنا محتاجين باش نعيشوا مطمانين وبعيد على الفوضى والفساد وغياب الأمان. ما بين شهر نوفمبر 2018 وشهر فيفري 2019، عيش تونسي نظّمت استشارة شعبية كبيرة شملت كامل تراب الجمهوريّة.

تواصلنا مع التوانسة من خلال خط مباشر على الميدان وعبر الهاتف وشبكات التواصل الإجتماعي وسمعنا مشاكلهم وعرفنا احتياجاتهم وخذينا مقترحاتهم والحلول الممكنة باش نخرجوا من الأزمة الحالية. بمشاركة أكثر من 400.000 شخص كانت أكبر استشارة غير مسبوقة في تاريخ تونس باش تمكّننا من توّا وحتى لآخر شهر مارس من وضع خطة عاجلة تمثّلنا سمّيناها "وثيقة التوانسة".

وثيقة التوانسة

وثيقة التوانسة كانت نتيجة شهادات وإقتراحات أكثر من 400 ألف تونسي شاركونا بآرائهم. الوثيقة تتضمن 12 إجراء استعجالي باش نطرحوهم على التوانسة للمصادقة عليهم لأنو هدفنا الأساسي هو أننا نحطّوا البلاد على السكة ونتخلصوا من الانتهازيين ونقضيوا على الفوضى.

Séparateur

في كواليس الإستشارة

خطوة غير مسبوقة باش نسمعوا التوانسة

البداية

"عيش تونسي" تولدت من حلم يتقاسموه ملايين التوانسة ، حلم بمجتمع يتمتّع فيه كل تونسي بفرصتو، بخدمتو، بغرامو مع عايلتو وفي بلادو

لكن في ظل غياب إهتمام السياسيين وبُعدهم على المواطنين بدينا أحنا بتنظيم تظاهرات باش نقربو من التوانسة ونزرعو فيهم الإبتسامة والأمل ، وقمنا بمبادرات كيما بثّ ماتشوات المنتخب التونسي في كأس العالم في برشة بلايص في مناطق وأحياء قالوا عليها مهمّشة ، بالإضافة الى هذا كرّمنا أبطال الخفاء من الناس اللي خدموا البلاد بدون مقابل ورغم تعبهم في الحياة حافظوا على البسمة وساهموا في النهوض بمجتمعهم وساعدوا غيرهم ورجّعوا معنى الروح التونسية المثالية.

خطوة غير مسبوقة باش نسمعوا التوانسة

إقبال غير منتظر

ضحكاتكم اللي مرّات كانت مليانة بالدموع وتشجيعاتكم لتظاهراتنا وإرادة المتطوعين اللي كانوا معانا منذ البداية(أكثر من 600 متطوع) باش يعيشوا المغامرة خلّاونا نزيدو نقدمو و نواصلو

زرعتوا فينا الرغبة باش نوسّعو مجال تدخلاتنا ونخذمو أكثر باش نوصّلو الضحكة والفرحة اللي تفقدت في بلادنا اليوم للأسف. من خلال مجموعة فيديواتنا التفاعليّة قرُبنا منكم أكثر وخير دليل على ذلك كان تفاعلكم مع أوجاع التوانسة والمشاكل اللي تحرمنا اليوم من أننا نعيشو حياة كريمة في بلادنا.

خطوة غير مسبوقة باش نسمعوا التوانسة

829 متطوع تحركوا معانا

120 يوم من حملة الحيط

العدد الكبير من تعليقاتكم اللي طرحتوا فيها مشاكلكم وحكيتوا فيها على الصعوبات اللي وقفت قدام طموحاتكم زرع فينا الرغبة باش نزيدو نسمعوكم ونستقبلو شهاداتكم موش كان عن طريق شبكات التواصل الاجتماعي في العالم الافتراضي وهذاكا علاش مشينالكم وقابلناكم في كل بلاصة وكل نقطة من الجمهورية.

مئات التوانسة كانوا معانا وقدّموا مساعدتهم وولّاو هوما الفاعلين في المشروع ومشاوا لكل الجهات في تونس باش يسمعوكم ويعرفوا "الحيوط" اليومية اللي تاقف قدامكم ويسمعوا اقتراحاتكم باش نحطوا البلاد عالسكة. ألف شكر للــ 800 متطوّع نساء ورجال، كبار وشباب اللي تقاسموا معانا مبادئنا وحلمنا في أننا نسدّوا الفراغ اللي خلاوه السياسيّين اللي خدموا مصالحهم الشخصية على حساب حياة التونسي ومشاكلو.

خطوة غير مسبوقة باش نسمعوا التوانسة
خطوة غير مسبوقة باش نسمعوا التوانسة

أكبر استشارة غير مسبوقة وقع تنظيمها في تونس

توقعنا أنو يشاركونا في الإستبيان بعض الآلاف من المواطنين لكننا تفاجئنا على خاطركم كنتو الى حد اليوم أكثر من 400.000 تونسي مشارك في الإستبيان الوطني وعبّرتوا على مواقفكم من الأوضاع في البلاد والأهمّ من هذا أنكم قدّمتوا برشة اقتراحات عاجلة وقابلة للتطبيق باش نخرّجو البلاد من الفوضى ونحطّوها على السّكة. جمعنا كل مشاكلكم واقتراحاتكم ورغباتكم وتمكّننا بالتكنولوجيا الحديثة من تحويل نتائج الدراسة لواقع ملموس.

التحدي القادم: القطع النهائي مع النظام اللي تسبّب في الأزمة الحالية اللي تمر بيها بلادنا.

نظمت عيش تونسي بعد هذا مجموعة من الصبحيّات والعشويّات في كامل أنحاء تونس باش ناقفو على النتائج الأولية للإستشارة الوطنية الكبرى في جميع مناطق الجمهورية التونسية.

قرّرنا خلق هذا الفضاء باش يكون وسيلة ومكان يسمحلنا باش نسمعوا رسائل التونسيين والتونسيات وباش نأكّدو اللي ماناش وحدنا وماناش أقلية بل نمثّلوا الأغلبية .

غدوة خير، الإستشارة الوطنية الكبرى اللي عملناها كانت الخطوة الأولى واللي مكّنتنا باش نحضّرو "وثيقة التوانسة" برنامج عاجل فيه 12 إجراء ناتج عن احتياجاتكم ومطالبكم وهي حلول إصلاحية عاجلة ما تتطلبش وقت وما تزيدش تعمّق في عجز الدولة ومن شأنها باش تحلّ المشاكل اللي يعانيوا منها التوانسة في حياتهم اليومية ، وكيما نعملو ديما في "عيش تونسي" وثيقة التوانسة باش تعاود ترجعلكم باش تصادقوا عليها ونأخذو رايكم فيها.

96 صبحيّة وعشويّة "عيش تونسي" (اجتماعات ميدانية) في الــ 24 ولاية في البلاد

كونوا في الموعد الأيامات الجاية باش تشوفوا النتائج النهائية للإستشارة الوطنية وتتطلعوا على "وثيقة التوانسة" وتصادقوا عليها.

خطوة غير مسبوقة باش نسمعوا التوانسة

415.000 تونسي شاركونا في الحملة

خطوة غير مسبوقة باش نسمعوا التوانسة

شكرا لكل المتطوعين اللي ساهموا في نجاح الحملة

برافو للجميع !

عندك رغبة في تغيير الواقع؟

إنضم لعيش تونسي !

برافو للجميع !

شكون عيش تونسي؟

عيش تونسي تجمع كل التوانسة اللي يحبوا يحطّوا البلاد على السكة. أحنا نخدموا باش كل تونسي يحسّن من قدرتو الشرائية وتتوفّرلو الفرص المتكافئة في التشغيل ويضمن حقو في العلاج وفي تأمين نفسو وعايلتو وأملاكو.

هذاكا علاش لازمنا نقضيوا على الفوضى اللي عمّت البلاد في الثمانية السنين الأخيرة واللي تسببت فيها الطبقة السياسية وهذا يتمّ من خلال وضع حد عاجل بالتصدي للقشارة والسمسارة والفاسدين اللي يستغلّوا في ضعف الدولة باش يستغناوا على حساب الشعب ومستقبل الأجيال القادمة.

  أكثر من 800 متطوع

  4 مبادرات موحّدة

  24 ولاية