علاش #مدامك_تونسي؟

برشا حاجات تراجعو في تونس: القدرة الشرائيّة والإحساس بالأمن وفرص التشغيل والقدرة على إقتناء مسكن لائق وغيرها من أساسيّات الحياة الأخرى. الشيء هذا الكل يضعّف من قدرة التونسي باش يعيش لحضات السعادة وجو الفرحة مع عائلته وأصحابو وأولادو. 

حاجات أخرى زادة  تراجعت في تونس: النّيف متاع التوانسة وإفتخارهم برواحهم، ثقتهم في رواحهم وفي العباد. هذا الي خلانا نحسو اليوم الحاجة باش نتجمعو حول المنتخب الوطني. الحكاية ماهيش حكاية كورة وتشجيع فقط. الحكاية حكاية لمّة ولحمة. نحبو نعيشو مع بعضنا تجربة فرحة، تجربة عميقة نقرّبنا من بعضنا أكثر. 

أيجاو عيشو مع عيش تونسي تجربة فريدة ومميزة باش تصير أول مرّة في بلادنا. تحضرو معانا البث المباشر للماتشوات الثلاث متاع المنتخب الوطني. هذا الكل باش يكون في الجم ورجيم معتوق نهار 18 جوان، في الكاف نهار 23 جوان، في الملّاسين نهار 28 جوان.

الجم

حاجة مزيانة كي نشوفوا ملايين من الأجانب يزوروا بلادنا و مهتمين بصناعاتنا التقليدية وتاريخنا و أرضنا، أما خسارة السياحة الداخلية ما نتفكروها كان كي مفماش سياح و فلوس. على خاطرنا نمّنوا اللي بحوراتنا وغاباتنا وصحرتنا وجبالنا و تراثنا يلزموا يمشي للتوانسة قبل أي حد. عيش تونسي تنظم #مدامك_تونسي للإحتفال بتراث بلادنا في وقت مهم برشة عند التوانسة : مباراة تونس و انجلترا في كأس العالم نهار 18 جوان 2018.

رجيم معتوڨ

في بلادنا، فمة تونس العاصمة والولايات الكبيرة والبقية. البقية هي المناطق الداخلية، و خصوصا الجنوب اللي ما إستفاد من شي كان الوعود اللي ما توفاش و ما تحقق منها شي . على خاطرنا نمّنوا اللي أهل الجنوب يستحقوا رد إعتبار للتضحيات اللي قدموها ، و على خاطر حتى في آخر الحدود نبقوا ديما توانسة، وعلى خاطر كل تونسي من حقو يعيش الفرحة وين ما كان . عيش تونسي تنظم #مدامك_تونسي في أبعد البقايع في تونس و في وقت مهم برشة عند التوانسة : مباراة تونس و بنما في كأس العالم نهار 18 جوان 2018.

الكاف

في تونس، و رغم الثروات الطبيعية والبشرية الكبيرة، المناطق الداخيلة تتحسب حمل ثقيل يعيق التنمية و الإستثمار في البلاد. التوانسة في الشمال الغربي و في الوسط الغربي ديما مربوطين بالفقر و إعانات الدولة و الجمعيات الخيرية. تشويه و تهميش تعاني منو المناطق هذه ، ما توصللهمش إمكانيات تخليهم يتمتعوا بقدراتهم و في نفس الوقت منسيين من أي حاجة تخليهم يحسوا إلي هوما توانسة عيش تونسي تنظم #مدامك_تونسي بش تورّي ولاد 08 على شنية قادرين ، و هذا في وقت مهم برشة عند التوانسة : مباراة تونس و بلجيكيا في كأس العالم نهار 23 جوان 2018.

الملاّسين

في تونس، الأحياء الشعبية في عين الناس هي بقايع فقر و بؤس و فقدان للأمل . سكان المناطق هذه مقصيين من أي نشاط ترفيهي ، ما يخمم فيهم حد ، إلا وقت الانتخابات وقتها أصواتهم تسوى بعض الدينارات. قليل وين ولاد الأحياء الشعبية عندهم الفرصة بش يحضروا في أي تظاهرة ترجع فيهم الروح و تنسيهم همهم من غير ما يخلصوا. عيش تونسي تنظم #مدامك_تونسي و ترد الإعتبار لولاد الأحياء الشعبية في وقت مهم برشة عند التوانسة : مقابلة تونس و بانما في كأس العالم نهار 28 جوان 2018

إلْقاوْنا على شبكات التّواصل الإجتماعي

تحب تعاون ؟

انت زادة تحب تشجع المنتخب الوطني و تحب تعيش الفرحة ؟ مالا ما تخممش مرتين و ايجا معانا و كون جزء من حلمة و خدمة كبيرة . لمزيد من المعلومات اتصل بينا على الخاص ...

تحب تشارك؟

انت زادة تحب تشجع المنتخب الوطني و تحب تعيش الفرحة وتعيّشها للي دايرين بيك؟ مالا ما تخممش مرتين و ايجا معانا بش تعاون و تكون جزء من حلمة و خدمة كبيرة . لمزيد من المعلومات اتصل بينا على الخاص ...